Terapia individual
Terapia individual
Este servizo vai dirixido a persoas adultas e mozas que, por algún motivo, teñen que facer fronte a momentos complicados, desafíos ou crises persoais nas que se senten atrapadas e que poden requirir dunha visión externa e experta para a súa xestión.
Buscar soporte psicolóxico pode axudar a identificar os procesos mentais e as condutas que están na orixe desas dificultades, ao tempo que se adquiren as habilidades necesarias para superalas.
A terapia individual tamén se orienta á avaliación de diferentes trastornos que provocan malestar e/ou dificultan a vida, co obxectivo de proporcionar ferramentas eficaces e recursos ás persoas que os padecen para que poidan recuperar a saúde mental e o benestar emocional. Podes acudir á consulta en Santiago ou elixir sesións online se che resulta máis cómodo.
Como imos traballar?
Tendo en conta que somos o que pensamos, o que sentimos e o que facemos e que, en ocasións, prodúcense disonancias entre estes tres sistemas de resposta, a intervención vai dirixida a identificar o diálogo interno, o sistema de crenzas, as necesidades, o estado emocional e o repertorio de comportamentos da persoa que acode en busca de axuda, co fin de poder ofrecer a solución e o recurso máis axeitado para cada caso particular.
A primeira sesión de terapia terá unha duración de 90 minutos. Este tempo é necesario non só para a recollida inicial da información imprescindible para a análise e avaliación do caso, senón tamén para a creación dunha alianza terapéutica axeitada. Establecer un clima de seguridade e confianza é fundamental para unha evolución correcta e satisfactoria da persoa.
As consultas sucesivas serán de 60 minutos. Nelas formularemos obxectivos concretos, facilitaranse explicacións necesarias sobre cada problema particular e proporcionaranse as ferramentas máis axeitadas para cada situación. Esta dinámica mantense tanto na consulta en Santiago de Compostela como nas sesións online.
Obxectivos
- Que a persoa acade independencia e autonomía o antes posible. O método de traballo reduce considerablemente o número de sesións.
- Que aprenda a identificar o que hai detrás de cada un dos seus pensamentos, comportamentos e emocións.
- Adquisición de habilidades de autoxestión emocional.
- Que poida aplicar os coñecementos adquiridos durante a terapia a dificultades futuras, ao estar dotada de estratexias de afrontamento sólidas.
- Reducir o risco de recaídas.